உலகம் முழுதும் கொண்டாடப்பட்ட சிவராத்திரி விழா

தென்னாடுடைய சிவனே போற்றி

என்னாட்டவர்க்கும் இறைவா போற்றி

ஸ்ரீ லிங்கேஸ்வரர் ஆலயத்தில் மகா சிவராத்திரி திருவிழா

கோலாலம்பூர்: மலேசியா, சுபாங் மாவட்டத்தில் 40 ஆண்டுகளுக்கும் மேலாக வீற்றிருந்து தன்னை தேடி வரும் பக்தர்களுக்கு குறையாது அருள் பாலித்து வரும் ஸ்ரீ லிங்கேஸ்வரர் ஆலயத்தில் 44ம் ஆண்டு வருடாந்திர மகா சிவராத்திரி திருவிழா 108 கலசாபி ஷேகத்துடன் கோலாகலமாக கொண் டாடப்பட்டது.

பல நூறு பக்தர்கள் ஆலயத்தில் ஒன்று திரண்டு தங்களின் நேர்த்தி கடனை நிறைவேற்றினர். கடந்த ஞாயிறன்று நடை பெற்ற சிவராத்திரி திருவிழாவில் சமூக சேவகர் அண்ணாமலை உட்பட திரளானோர் கலந்து லிங்கேஸ்வரரின் ஆசியைப் பெற்றனர். தற்போது ஆலயத்தின் உட்புறத்திலும் வெளிப்புறத்திலும் ஒரு சில நிர்மாணிப்பு பணிகளை மேற்கொள்ளப் படவிருக்கிறது. அதற்கு பொது மக்களின் உதவியையும் கொடை நெஞ்சங்களின் ஆதரவையும் ஆலய நிர்வாகம் நாடுவதாக செயலாளர் மணிகந்தன் கூறினார். 

- கோலாலம்பூரிலிருந்து காயத்ரி

சிங்கப்பூரில் மகா சிவராத்திரி விழா

சிங்கப்பூர் : சிங்கப்பூர் சிவாலயங்களில் மகா சிவராத்திரிப் பெரு விழா மிகச் சிறப்பாக நடைபெற்றது. மார்ஷலிங் அருள்மிகு சிவ கிருஷ்ணர் ஆலயத்தில் மார்ச் 10ம் தேதி யாகசாலையில் வேத கோஷம், சந்நிதியில் அபிஷேகம் அலங்காரம் ஆராதனை, வசந்த மண்டபத்தில் தேவாரப் பண்ணிசை, நாதஸ்வர இசையாஞ்சலி என மகா சிவராத்திரிப் பெருவிழா நான்கு காலப் பூஜைகளாக கோலாகலமாகக் கொண்டாடப்பட்டது. முதல் காலம் நித்திய பூஜையைத் தொடர்ந்து மாலை 6 மணிக்கு சங்கல்பம், கலச பூஜை, ஸ்ரீ ருத்ர ஹோமம், ஸ்ரீ விசாலாட்சி அம்பிகா சமேத ஸ்ரீ விஸ்வநாதப் பெருமானுக்கு சிறப்பு அபிஷேகம், விசேஷ வில்வ அர்ச்சனை, அலங்காரம், மகா தீபாராத‌னை என நடைபெற்றது. இரண்டாம் கால பூஜை இரவு 9 மணிக்கு தொடங்கி ஸ்ரீ விஸ்வநாதப் பெருமானுக்கு ஸ்ரீ சிவ மூல மந்திர ஹோமம், அபிஷேகங்கள் ஆராதனைகள், அலங்காரம் நடைபெற்றது. மகா தீபாராதனையுடன் திரளான பக்தப் பெருமக்கள் கலந்து கொண்ட பால்குட அபிஷேகமும் மகா தீபாராதனையும், பாலாமணி சிவாச்சாரியாரின் சிவராத்திரி பற்றிய சிறப்பு சொற்பொழிவும் நடைபெற்றன. மூன்றாம் கால பூஜை இரவு ஒரு மணிக்குத் தொடங்கி ஸ்ரீ ருத்ர திரிசதி விஷேச ஹோமத்துடன் நடைபெற்றது. அதிகாலை 4 மணிக்கு நான்காம் கால பூஜை துவங்கியது. இதில் விசேஷமாக ஸ்ரீ பஞ்ச அஸ்திர ஹோமத்துடன் சிறப்பு கலசாபிஷேகம், அபிஷேகம் அலங்காரம் மகா தீபாராதனை நடைபெற்றது. மகா தீபாராதனைப் பெருவிழா நிறைவு பெற்றது. ஸ்ரீ சிவ கிருஷ்ண ஆலய பஜனைக் குழுவினரின் தேவாரப் பண்ணிசையும் மற்றும் ஆலய தேவாரத் திருமுறைக் குழுவினரின் இன்னிசையும் இரவு முழுவதும் நடைபெற்றுப் பக்தப் பெருமக்களுக்குப் பெரு விருந்தாக அமைந்தது. ஆலய நிர்வாகக் குழுவினரும் அர்ச்சகர்களும் பெருந் திரளாக கூடிய பக்தப் பெருமக்களுக்கு அபிஷேக ஆராதனை கண்டு மகிழவும் இசை நிகழ்ச்சிகளைக் கேட்டு இன்புறவும் பிரசாதங்கள் சுவைத்து உண்ணவும் விரிவான ஏற்பாடுகளைச் செய்திருந்தனர்.
- நமது செய்தியாளர் வெ.புருஷோத்தமன்

 

ஒமாஹாவில் மகாசிவராத்திரி விழா

ஒமாஹா : ஒமாஹா இந்துக் கோயிலில் மார்ச் 09ம் தேதி மகா சிவராத்திரி விழா மிகச் சிறப்பாகக் கொண்டாடப்பட்டது. மாலை 5 மணியளவில் சங்கல்பத்துடன் துவங்கிய இவ்விழாவில் கலச பூஜை, ஏகாதச ருத்ர அபிஷேகம் ஆகியன நடத்தப்பட்டது. பின்னர் உபயதாரர்களும், பக்தர்களும் தங்கள் கைகளாலேயே சிவலிங்கத்திற்கு அபிஷேகம் செய்தனர். மூலவர் அபிஷேகத்தை தொடர்ந்து ஸ்படிகலிங்கத்திற்கு பக்தர்கள் அபிஷேகம் செய்தனர். பக்தர்களின் பஜனைகளும், கர்நாடக இசைக் கச்சேரிகளும், வீணை கச்சேரியும் நடைபெற்றது. சிறப்பு அலங்காரத்தில் பக்தர்களுக்கு காட்சி அளித்த சிவ பெருமானுக்கு மகா தீபாராதனை காட்டப்பட்டது. அஷ்டோத்திர நாமாவளி மற்றும் திரிசதியை தொடர்ந்து உத்திர பூஜை நடைபெற்றது. இவ்விழாவில் ஏராளமான பக்தர்கள் கலந்து கொண்டு சுவாமி தரிசனம் செய்தனர். 

தென்னாடுடைய சிவனே போற்றி

என்னாட்டவர்க்கும் இறைவா போற்றி